Saboda haka aka gargadi jama’a da su bi umarnin hukumomi da na jami’an tsaro don ganin an cimma nasarar sabbin matakan tsaron da za su biyo baya.
Jerin hare-haren da aka fuskanta daga ranar Lahadi 15 ga watan Satumba zuwa ranar Larabar 18 a jihohin Tilabery, Diffa da Tahoua, ya haddasa asarar rayukan sojoji sama da 10.
Gwamnatin mulkin sojan Nijar, wacce ta saurari bahasi daga ministan tsaron kasa, Janar Salifou Mody, a taron majalisar ministoci na yammacin ranar Alhamis, ta ce wannan aika-aika da ke faruwa a daidai lokacin da ake cika shekara 1 da kafuwar kungiyar AES, yunkuri ne na kaste wa kasashen yankin hanzari a ayyukan ci gaban da suka dukufa a kai.
“Hasali ma makarkashiya ce da abokan gaba suka kitsa da nufin rikita al’amura a wadanan kasashe saboda haka ya zama wajibi a tsaurara matakan tsaro a karkashin dokar ta bacin da gwamnatin ta kafa a watan ogustan 2024,” in ji ta.
Abdourahamane Alkassoum, mai sharhi ne kan sha’anin tsaro ya ce halin da ake ciki a yau a Nijar da makwabta ya kai matsayin da za a dauki irin wannan mataki.
An dai bukaci al’umma ta bai wa hukumomi da jami’an tsaro hadin kai don ganin an zartar da sabbin matakan da za a shimfida a nan gaba ba tare da wata tangarda ba.
Shugaban kungiyar makiyayan arewacin jihar Tilabery Boubacar Diallo ya yi na’am da wannan tsari, ko da yake kuma a cewarsa abin na bukatar gyara.
Tun a farkon watan nan na Satumba ne jami’an tsaro suka kaddamar da ayyukan sintiri da binciken ababen hawa a manyan biranen Nijar mai lakanin Operation tsaron kasa da nufin tabbatar da tsaron cikin gida.
Yayin da alamu ke nunin abubuwan da suka wakana a farkon mako da ya wuce a jihohin Diffa, Tilabery da Tahoua da daya gefe farmakin ta’addancin da aka kai a birnin Bamako na kasar Mali sun sa hukumomin tsaro kara jan damara a ciki da kewayen birnin Yamai.
Saurari cikikakken rahoton Souley Moumouni Barma:
Your browser doesn’t support HTML5
Za'a Kara Daukan Tsauraran Matakai A Yankunan Da Ke Karkashin Dokar Ta Baci A Nijar.mp3