Rundunar sojojin Najeriya, shiyya ta bakwai dake garin Maiduguri, ta tarwatsa sansanonin ‘yan Boko Haram, a kyauyukan Kushembiri da Walmure, a karamar hukumar Konduga dake jihar Borno.
Rundunar ta bakin mataimakin mai hulda da jama’a, na rundunar Kanal Tukur Gusau, ya shedawa manema labaru ciki harda wakilin muryar Amurka Haruna Dauda cewa sun shiga wadannan kyauyukan ne inda suka fafata da ‘yan kungiyar Boko Haram.
A wannan fafatawar da aka yi Sojojin sun yi nasarar kubutar da mutane hamsin da tara da suka hada da yara da kuma dattawa inda kuma suka hallaka ‘yan kungiyar da dama.
A yanzu haka dai rundunar Sojan kasar na ci gaba da kai samame a irin wadannan kyauyuka ta kuma ce tana samun nasara kwarai da gaske wajen kubutu da jama’a da kuma kwato makamai daga hannun wadannan ‘yan kungiyar ta Bomo Haram.