Kasashen Afrika dai na fama da matsalar 'yan gudun hijira a sakamakon yawaitar tashe-tashen hankula da kuma yawaitar yaki ko kuma juyin mulki.
Yara 'Yan Gudun Hijira A Kauyen Luvu da ke Karu A Jihar Nasarawa
Yanzu haka dai rahotanni sun nuna dubban jama'a ne ke zaman gudun hijira a kasashen Sudan da kuma yankin Falasdinu a sakamakon yaki da ake gwabzawa a yankunan,
A Najeriya kuma matsalar hare-haren 'yan bindiga ne ke ci gaba da tilastawa jama'a tserewa daga muhallansu, kamar Munnir Mu,azu Ruma daga jihar Katsina mai fama da matsalar 'yan ta'addan daji.
Ya ce halin da 'yan gudun hijira suke a yankunan kananan hukumomi 8 na jihar Katsina abin tayar da hankali ne.
Yan Gudun Hijira a Sansanin Ramin Kura a Sokoto
Dan Masanin Birnin Gwari Zubairu Abdur'rauf ya ce ranar da Majalisar Dinkin Duniya ta ware akan 'yan gudun hijira ba za ta yi wani tasiri ba sai an hada da daukar matakin kawar da 'yan bindiga da suke tilastawa jama'a barin garuruwansu.
A jihar Neja kuma Muryar Amurka ta zanta da wasu 'yan gudun hijirar dake zaune a yankin Erana ta karamar hukumar Shiroro da suka ce mayakan Boko-Haram ne suka koro su daga garuruwansu na asali.
Hukumomi a fannoni daban-daban na Najeriya sun sha bayyana cewa suna daukar matakai ko dai na kai kayan agaji ko kuma na samar da tsaron da zai mayar da 'yan gudun hijirar muhallansu.
Fata dai shine kyaututuwar tsaro a Najeriya da kuma sauran duniya da kuma magance matsalar yaki a kasashen Afirka da duniya baki daya ta yadda za,a samu kwanciyar hankali gaba daya.
Saurari cikakken rahoto daga Mustapha Nasiru Batsari:
Your browser doesn’t support HTML5
Ranar 'Yan Gudun Hijira Ta Duniya: Halin Da Na Najeriya Suke Ciki.mp3