WASHINGTON, D. C. - Wasu, ciki har da Amurka, sun yi kakkausar suka ga zargin da Afirka ta Kudu ta yi na cewa Isra’ila na karya yarjejeniyar Majalisar Din kin Duniya kan Kariya da Hukuncin Laifukan Kisan Kare Dangi. Wasu kasashen da yawa sun yi shiru.
Matakin da duniya ta dauka game da shari'ar da aka fara a ranar Alhamis da Juma'a da suka gabata, a kotun kasa da kasa da ke birnin Hague, na nuni da rarrabuwar kawuna a duniya idan aka zo ga matsalar da Isra'ila da Falasdinawan suka shafe shekaru 75 suna fama da ita. Ranar Lahadi ne aka cika kwanaki 100 na rikicin da aka fi zubar da jini.
Yawancin kasashen da ke goyon bayan shari'ar Afirka ta Kudu sun fito ne daga kasashen Larabawa da Afirka. A nahiyar Turai, Turkiyya kasar al'ummar Musulmai ce kawai ta fito fili ta bayyana goyon bayanta.
Babu wata kasar yammacin Duniya da ta bayyana goyon bayanta ga zargin da Afirka ta Kudu ta yi wa Isra'ila. Ita ma Amurka, abokiyar kawancen Isra'ila, ta yi watsi da batun a matsayin mara tushe, Birtaniya ta kira zargin mara gaskiya, kuma Jamus ta ce "ta yi watsi da shi."
Amma China da Rasha ba su ce komai ba game da abin da yake daya daga cikin manyan kararraki da aka gabatar a gaban kotun kasa da kasa. Tarayyar Turai ita ma ba ta ce komai ba.
-AP
Dandalin Mu Tattauna