Dan wasan Faransa Kylian Mbappe, ya taimakawa kasar wajen samun nasara shiga gasar zakarun turai bayan da ya zura kwallaye biyu a ragar Netherland.
Faransa ta lallasa Netherland da ci 2-1 a rukuninsu na B.
Gabanin wannan wasa, an yi ta yamadidin cewa tauraruwar Mbappe mai shekaru 24 ta daina haskawa bayan da ya gaza zura kwallo ko daya a wasannin hudu da PSG ta buga.
Sai dai wadannan kwallaye da ya zura a wannan karawa ta rufe baki mutane da dama.
Mbappe ya zura kwallon farko a minti na bakwai sai kuma ta biyu a minti na 53.
Dan wasan Dutch Quilindschy Hartman ya farke kwallo daya a minti na 83.
A gefe guda kuma Girka ta doke Ireland da ci 2-0 nasarar da ta saka ta a mataki na biyu bayan Faransa a rukunin.
A ranar Litinin Netherland za ta fafata da Girka.
Dandalin Mu Tattauna