Wani mutumi sanye da kayan sojan Afghanistan ya bude yau talata ya kashe wani janar na sojan Amurka, ya raunata wasu sojojin na Amurka da na kasashen waje da dama, a wani lamarin da ake baynnawa a zaman harin cikin gida na baya bayan nan daga sojojin Afghanistan.
Sakataren yada labarai na ma'auikatar tsaron Amurka, Rear Admiral John Kirby, ya fadawa 'yan jarida a Washington cewa an kashe wani janar na sojan Amurka, amma bai bayyana sunansa ba.
Wannan sojan Amurka mai mukamin Manjo-Janar, wanda shi ne soja mafi girman mukami na Amurka da aka taba kashewa a Afghanistan, an ce an harbe shi kusa da kusa sosai a lokacin da ya kai ziyara zuwa Jami'ar Tsaron Kasa ta Marshall Fahim a Kabul.
Wadanda suka ji raunin sun hada da wasu sojojin kasashen waje dake Afghanistan, cikinsu har da wani Birgediya-Janar dan kasar Jamus.
Ma'aikatar tsaron Afghanistan ta ce an kashe wannann maharin da ta bayyana a zaman dan ta'adda sanye da rigar sojan Afghanistan.
Shugaba Hamid Karzai yayi Allah wadarai da wannan harbin, ya kuma mika ta'aziyyarsa ga iyalan dukkan wadanda abin ya shafa.
