An zakulo gawawwaki 10 daga karkashin baraguzan wani bene daya ruguje a unguwar Jegede da shiyar Olunloyo ta birnin Ibadan, fadar gwamnatin jihar Oyo.
Haka kuma an yi nasarar ceto mutane 7 da suka samu nau’ukan raunuka daban-daban daga wurin da al’amarin ya faru a yau Alhamis.
Sanarwar da janar manajan hukumar kashe gobara ta jihar Oyo, Yemi Akinyinka ya fitar, tace hukumar ta samu kiran gaggawa daga mazauna yankin da misalin karfe 2 da dare cewa wani gini ya rushe tare da danne mutane a karkashin baraguzansa.
Ita ma sanarwar da hukumomin ‘yan sanda suka fitar ta tabbatar da afkuwar lamarin. “An dauki kwararan matakan tsaro a yankin domin hana batagari mamaye wurin da ginin ya rushe sannan ana tabbatar da tsaron rayuka da dukiyoyin sauran mazauna yankin,” a cewar ‘yan sanda.