Ambaliyar ruwa ta rusa katangar gidan yarin Maiduguri dake yankin “Custom” inda wasu fursunoni suka nutse sannan wasu da dama suka arce domin neman tsira da rayukansu.
washington dc —
Ambaliyar ta mamaye manyan hanyoyi da shaguna a birnin maiduguri, fadar gwamnatin jihar borno da wani yanki na karamar hukumar Jere.
Fadar Shehun Borno da asibitin koyarwa na jami’ar Maiduguri da gidan namun daji na sanda kyarimi na daga cikin gine-ginen gwamnati da ambaliyar ta malale.
Dubban mazauna yankin dake kusa da gangare da yankunan fadama sun rasa muhallansu, kuma galibinsu mata ne da kananan yara.