Mafi akasarin wayoyi masu amfani da manhajar Android, na daukar bayanan mutane da mika su ga kamfanin Google, koda kuwa tsarin nuna bayanan mutun a kashe yake a wayar shi.
Kamfanin jaridar Quartz, suka bayyanar da wannan rahoton, dake bayyanar da cewar duk wasu wayoyin android, na nadar bayanan mutane a yayin da suke kusa da Ariyar kamfanoni waya, da kuma aika duk bayanan ga shafin Google.
A cewar wani manazarcin hakkin bil’adam, ya bayyanar da wannan a matsayin “Cin amana” su kuwa kamfanin na Google, sun tabbatar ma gidan jaridar na Quartz da cewar, basu ajiye wadannan bayanan, kuma zasu yi gyara a na’urorin su don su daina karbar wadannan bayanan.
Matsalar dai na shafar wayoyin android ne da suke dauke da tsarin ‘Google Play’ idan yana kunne a wayar su, dama dai shi tsarin Google play, anyi shine don ya dinga daukar bayanai, musamman wadanda suka shafi manhajoji a wayoyin mutane.
An dai iya gano cewar mafi akasarin wayoyi masu amfani da manhajar android, sun kwasar bayanan mutane wadanda suka hada da inda mutun yake a kowane lokaci, daga bisani suke aikama kamfanin Google.