NIAMEY, NIGER - Lamarin ya faru ne a wajejen karfe 6:30 na safe a kauyen Bourkou Bourkou dake km 30 da mahakar zinaren garin Samira na jihar Tilabery inda wani jirgin sojan Faransa Samfarin A 400M da ya taso daga kasar Chadi ya afkawa dakarun tsaron Nijar a cewar sanarwar da Kakakin Majalissar sojoji ta CNSP kanal Amadou Abdourahamane ya karanta a kafar talbijan RTN mallakar gwamnati.
Jirgin wanda ya tashi da karfe 6:01 na safe ya keta matakin rufe sararin samaniyar da Nijar ta dauka a baya-bayan nan da nufin kare kanta daga barazanar harin da kasar ke fuskanta sanadiyar juyin mulkin na 26 ga watan Yulin 2023.
Kawo yanzu ba a tantance yawan mutanen da suka rasu ba sakamakon faruwar wannan al’amari da ke gaskanta zargin da ake yi wa Faransa dangane da alakar da ke tsakaninta da kungiyoyin ta’addanci a cewar wannan sanarwa wacce ta kara da cewa wannan wani yunkuri ne da kasar Faransa ta sa gaba da nufin haddasa tashin hankali a Nijar, a ci gaba da neman hanyoyin bata sunan Majalisar soja ta CNSP a kuma shiga tsakaninta da al’ummar Nijar kamar yadda abin ya wakana a kasashen Mali da Burkina Faso.
To sai dai dazun nan hukumomin Faransa sun musamta zargin da sojojin Nijer suka yi akan cewa dakarun Faransa sun Kai farmaki kan sojojin Nijer a kauyen Bourkou Bourkoun jihar Tilabery a yau laraba 9 ga Watan Ogusta.
📍Har yanzu muna bin diddigen wannan labarin don kawo muku cikakken rahoton agaba.
Dandalin Mu Tattauna