Dan wasan Bayern Munich Sadio Mane na ci gaba da tabbatarwa da sabuwar kungiyarsa cewa ba ta yi zaben tumun dare ba, bayan da ya zura kwallonsa ta biyar a wasanni shida.
A ranar Laraba Bayern ta lallasa Viktoria Cologne da ci 5-0, inda Mane ya ci kwallo ta uku bayan an dawo daga hutun rabin lokaci a gasar German Cup.
Yanzu Bayern ta kai zagaye na biyu kenan a gasar.
Mane, wanda dan salin kasar Senegal ne, ya koma Bayern daga kungiyar Liverpool da ta zo ta biyu a gasar Premier League a kakar wasan da ta wuce.
Wannan tawagar ‘yan wasa ta Bayern, ta sha banban da wacce ta kara da Borussia Moenchengladbach a karshen makon da ya gabata.
Mai horar da ‘yan wasan kungiyar, Julian Nagelsmann, ya shigo da sabbin ‘yan wasa bakwai a wanna karawa da Cologne.
