A wani lamarin da har yanzu babu tabbas kan ko menene ke faruwa, ana ta jin karar harbe-harben bindigogi a Potiskum dake Jihar Yobe.
Mazauna garin na Potiskum sun ce an fara jin karar harbe-harben tun wajen karfe 8 da wani abu na wannan daren alhamis, da farko jefi-jefi, amma daga baya aka goce sosai da harbe-harbe.
An ce karar harbe-harben na fitowa ne daga inda ofishin 'yan sanda na yanki yake a kusa da gidan waya na tsakiyar garin Potiskum.
Wani mazaunin Potiskum, Alhaji Muntari Adamu Yerima, ya fada mana yanzun nan cewa babu karar fashe-fashen bam ko nakiya, amma harbe-harben yayi tsanani kuma mutane sun gudu zuwa cikin gidajensu.
Har yanzu dai babu wani bayani na ko menene ke faruwa. A cikin kwanaki biyun nan dai, an samu tashin bama-bamai da dama a garin na Potiskum, dukkansu a kan cibiyar Musulmi ko Masallaci.
