Shugaban hukumar kashe gobara ta birnin Washington John Donnelly ya shaidawa taron manema labarai cewar adadin wadanda suka mutu a hatsarin jirgin saman ya karu zuwa mutane 28 yayin da ma’aikatan bada agaji, da yawansu ya kai kimanin mutum 300, ke aiki cikin yanayi mai matsanani rashin kyau kuma suna nuna alamun cewar zai yi wuya a samu sauran mai rai.
Wani karamin jirgin saman fasinja dauke da mutane 64 ya rikito cikin kogin Potomac na birnin Washington a jiya Laraba bayan da yayi karo da wani shelkwaftan soja a sararin samaniya, inda kafafen yada labaran Amurka suka bada rahoton tsamo dimbin gawawwaki daga cikin duhun kogin dake da matukar sanyi.
Ana ci gaba da gagarumin aikin ceto, inda masu ninkayar dake nutso cikin kogin Potomac da dusar kankara ta lullube domin tattaro tarkacen jiragen saman 2.
Jirgin kirar bombardier da wani reshen kamfanin sufurin jiragen saman American Airlines ke gudanarwa na tunkarar filin saukar jiragen saman “Reagan National Airport” da misalin karfe 9 dare agogon amurka bayan daya taso daga birnin Wichita na jihar Kansas, sa’ilin da hatsarin ya afku.
Dandalin Mu Tattauna