Kungiyar kasashen masu arzikin man fetur (OPEC) ta bayyana cewa samar da albarkatun man fetur din da matatar Dangote ta ke yi ya rage yawan shigo da albarkatun daga nahiyar Turai.
A cikin rahotonta na wata-wata a kan kasuwar mai da aka wallafa a ranar 15 ga watan Janairun da muke ciki, OPEC tace sakamakon kokarin da matatar da ke da mazauni a Legas ta ke yi, dole ne tarin man da ake samarwa a kasuwannin duniya ya nemi wasu sabbin kasuwannin.
Yanzu matatar man Aliko Dangote da aka gina a kan dala biliyan 20 da ka iya tace ganga 650, 000 a kullum na samar da tataccen dizil da fetur da kuma man jirgin sama ga dillalai.
Najeriya, kasar Afirka mafi yawan jama’a, na fuskantar matsalar makamashi, inda dukkanin matatun man gwamnatin kasar suka daina aiki tsawon lokaci in banda a baya-bayan nan.
Kasar ta dogara ne kacokan a kan shigo da tatattun albarkatun man, inda kamfanin man kasar NNPC ya kasance babban mai shigo da muhimman kayayyakin bukatar.
Dandalin Mu Tattauna