Shugaban Najeriya Bola Ahemd Tinubu ya sanar da nada kakakin Majalisar Wakilan kasar Femi Gbajabiamila a matsayin shugaban ma’aikatan fadar Shugaban Kasa.
WASHINGTON, D.C. —
Shugaban kasar kuma ya nada tsohon mataimakin gwamnan jihar Jigawa, Sanata Ibrahim Hassan Hadejia, a matsayin mataimakin shugaban ma’aikatan fadar.
Wadannan nade-nade sun fito ne a cikin wata sanarwa da daraktan yada labarai na fadar gwamnati Abiodun Oladunjoye ya fitar a ranar Juma’a a Abuja.
A wata ganawa da kungiyar gwamnonin jam’iyyar APC wato Progressive Govenors Forum (PGF), shugaban kasar ya kuma nada tsohon gwamnan jihar Benue kuma tsohon ministan ayyuka na musamman a gwamnatin da ta shude, George Akume, a matsayin sakataren gwamnatin tarayya (SGF).
Wannan dai su ne nade-nade na farko da shugaban kasar ya yi tun bayan shan rantsuwar kama aiki a ranar Litinin 29 ga watan Mayu.