‘Yan wasan Najeriya na Super Eagles za su hadu da Tunisia a zagayen ‘yan 16 bayan da suka kammala zagayen rukuninsu cikin annashuwa.
Najeriya ta lashe dukkan wasanninta uku inda ta kare da maki tara bayan da ta doke Egypt da ci 1-0, Sudan 3-1 da Guinea-Bissau da ci 2-0 a rukunin D.
A ranar Lahadi za a buga wasan a filin wasa na Garoua da ke Kamaru mai karbar bakuncin gasar.
Tunisia ta kare a matsayi na uku a rukuninsu na F amma ta yi nasarar tsallakawa rukunin na ‘yan 16.
Ita dai Tunisia ta fuskanci kalubale da dama a wannan gasa ta AFCON 2021, a wasanta na farko ta sha kaye da 1-0 a hannun Mali kafin ita ma ta yi wa Mauritania cin kaca da ci 4-1 a wasanta na biyu.
Sai dai ta sake shan kaye a hannun Gambia a wasanta na uku da ci 1-0, kuma gab da wasan ne kusan rabin ‘yan kwallonta suka kamu da COVID-19.
Ita kuwa Egypt da ta zo ta biyu a rukunin D, za ta hadu da Ivory Coast ne a ranar Laraba a filin wasa na Japoma da ke birnin Douala.
.