Rundunar ‘yan Sandan jihar Benue ta cafke wani matashi mai nakasa mai suna Sylvanus Ukpan,mai shekaru talatin da biyar, wanda ake zargi da taimakawa bata gari.
Shi dai Ukpan, an cafke shine da wani abokin harkarsa a karamar hukumar Katsina-Ala, dake cikin jihar ta Benue, a bisa wani tsegumi da rundunar ta samu game da harkokinsa.
Jawabin kwamishinan ‘yan Sandan jihar Bashir Makama, ta bakin kakakin rundunar jami'an, Mose Yamu, yace a lokacin da aka damke Ukpan, yana kan hanyarsa ta zuwa Wukari, ne a jihar Taraba.
Ya kara da cewa an same shi da rigunan da harsashi baya hudawa har guda bakwai wanda ake zargin cewa zasu kaiwa wasu gungun mugayan mutane ne.
Bincike ya nuna cewa ukpan, na taimakawa bata gari da makamai da kuma tsubbuce tsubbuce, a yankin kuma rigunan da harsashi baya hudawa, kowace guda na kaiwa kimanin Naira dubu dari biyu da hamsin (250,000).