An bude makarantu a Damokaradiyar Jamhuriyar Congo ne watan da ya gabata. Asusun UNICEF yace an sami gagarumar nasara a kokarin ganin yara sun koma makaranta a yankin da aka yi fama da cutar ta Ebola.
Kakakin asusun Christophe Boulierac yace, sun sami kwarin guiwa sosai ganin yara da dama sun koma makaranta. Yace makaranta tana samar da yanayi da ya dace.
Bourlierac yace yaran da suke makaranta suna koyon yadda zasu kare kansu daga kamuwa da Ebola idan sun koma gida. Yace wannan yana taimakawa wajen dakile yada cutar a tsakanin al’umma.
Asusun UNICEF ya kirga sama da makarantu dubu daya da dari biyar a yankunan da aka sami bullar cutar Ebola. Daga cikinsu, makarantu dari uku da sittin da biyar suna inda cutar tafi barazana. Cibiyar ta samar da makayan kiwon lafiya da tsabtace muhalli a wadannan makarantun.