Ingila ta doke Najeriya da ci 4-2 a bugun daga kai sai mai tsaron gida a yau Litinin, inda ta samu nasarar tsallakewa zuwa matakin daf da na kusa da na karshe a gasar cin kofin kwallon kafa ta mata ta FIFA, wadda Australia da New Zealand ne masu masaukin baki.
WASHINGTON, D. C. - Kusan mutane 50,000 ne suka halarci wasan na Ingila da Najeriya a filin shakatawa na Lang da ke Brisbane na kasar Australia. Wannan ya zama rashi mai ban takaici ga Super Falcons ta Najeriya.
Super Falcons sun bugi gefen sandar da kwallo sau biyu a cikin mintuna 90 na kwallon kafa ba tare da zura kwallo a raga ba kafin a tashi daga wasan, kuma sun samu damar cin kwallo daya a lokacin karin lokaci bayan da Lauren James ta Ingila ta samu jan kati saboda taka Michelle Alozie ta Najeriya.