A wani al’amari da ya faru a baya-bayan nan, hukumar yaki da yi wa tattalin arzikin kasa ta’annati (EFCC) ta saki tsohon gwamnan jihar Benue, Samuel Ortom bayan tsare shi da tayi tsawon sa’o’i.
Labarin tsare Ortom da hukumar ta yi ya haifar da ce-ce-ku-ce a fagen siyasar kasar.
A cewar majiyoyi da dama, hukumar EFCC ta gayyaci gwamna Ortom ne domin amsa tambayoyi, sai dai bayan shafe kusan sa'o'i tara zuwa goma a ofishin hukumar da ke jihar Benue, hukumar ta yanke shawarar sakin shi.
Gwamnan jihar Benue, Samuel Ortom
Labarin sakin Ortom ya sami yabo daga jam’iyyar PDP, wadda gwamnan ke cikinta. A cikin wata sanarwa, jam’iyyar PDP ta bayyana gamsuwarta da yadda Ortom ya nuna jarumtaka da jajircewa a duk lokacin da ya fuskanci kalubale.
Jam’iyyar ta PDP ta ci gaba da yabawa da sakin shi da hukumar ta EFCC tayi, inda ta bayyana cewa hakan na kara nuna jajircewa wajen tabbatar da gaskiya da rikon amana a ma’aikatun gwamnatin kasar.
Yayin da ba a bayyana cikakken bayani game da gayyatar da hukumar EFCC ta yi ma gwamna Ortom ba, da kuma dalilin sakin sa, hakan dai na faruwa ne a daidai lokacin da hukumar EFCC ke kara kokari wajen yaki da cin hanci da rashawa a Najeriya.
Ofishin EFCC a Abuja
Hukumar ta yi ta gudanar da bincike tare da cafke wasu manyan mutane da ake zargi da tafka magudin kudi.
Samuel Ortom wanda fitaccen jigo ne a jam’iyyar PDP, shi ne gwamnan jihar Benue tun daga shekarar 2015 zuwa 2023. A zamaninsa ya fuskanci kalubale dabam-daban, ciki har da rikicin manoma da makiyaya da ya addabi jihar.
Duk da wannan kalubalen, Ortom ya ci gaba da tofa albarkacin bakinsa kan batutuwan da suka shafi mulki cikin jihar da kasa baki daya.
Matakin da EFCC ta dauka na sakin gwamna Ortom bayan an yi masa tambayoyi ya nuna cewa watakila babu wata kwakkwarar hujja da ke tabbatar da zargin da ake masa a halin yanzu.
Ko da yake, ana ci gaba da gudanar da binciken har yanzu a hukumar EFCC kuma za a iya samun ci gaba a nan gaba.
Yayin da labarin sakin gwamna Ortom ke yaduwa, manazarta harkokin siyasa da ma ‘yan Najeriya baki daya, sun zuba ido sosai a kan halin da ake ciki game da duk wani abu da zai iya yin tasiri a fagen siyasa da kuma kokarin yaki da cin hanci da rashawa a kasar.
Yusuf Aminu Yusuf.