Henry Kissinger, Tsohon Babban Jami'in Diflomasiyyar Amurka A Karkashin Nixon, Ya Mutu Yana Da Shekara 100

Ya kuma sha yabo na nasarorin diflomasiyya da kuma cece-kuce kan yadda ya tafiyar da siyasa a duniya.

Kamfanin sa ne ya sanar da rasuwarsa kuma ba a bayar da wani dalili ba.

Za a cigaba da alakanta tsohon sakataren harkokin wajen Amurka har abada da shugaba Richard M. Nixon, musamman ma ga kokarin da suka yi a fannoni uku: fitar da Amurka daga yakin Vietnam, bude huldar diflomasiyya da kasar China da kuma rage zaman dar-dar da Tarayyar Soviet.

Richard Nixon tare da Henry Kissinger.

An san shi a matsayin babban masani, wanda ya ci lambar yabon Nobel ta zaman lafiya kuma fitaccen ɗan gudun hijira a Amurka.

Mai tunanin ra'ayin mazan jiyan ya taimaka wajen samar da ɗimbin nasarorin diflomasiyya, gami da gyara dangantaka da China da kuma tsare Tarayyar Soviet.

An ba shi lambar yabo ta zaman lafiya ta Nobel tare da Le Duc Tho na Arewacin Vietnam saboda kokarin da suka yi na bada shawarwarin kawo karshen yakin Vietnam.
Kissinger kuma ya sami nasarori da yawa a Gabas ta Tsakiya, gami da bada shawarwari kan yarjejeniyar Sinai ta 1975 tsakanin Masar da Isra'ila, da kuma aikin da ya yi wajen samun cigaba ga tsarin zaman lafiya tsakakin Larabawa da Isra'ila.

Sakatare Janar na Tarayyar Soviet da Henry Kissinger a Moscow

Duk da nasarorin da ya samu a fadin duniya, Kissinger ya kasance mutum mai cike da cece-kuce, inda masu sukar suka yi zargin cewa ya rufe ido yayin ruwan bama bamai da aka kai kan wani bangaren Cambodia, ya kuma goyi bayan Pakistan ta murkushe Bangladesh, kuma bai yi wani yunkurin hana Argentina yakin da ta yi da ‘yan adawa ba.

An kuma soki Kissinger saboda rawar da ya taka a tashe-tashen hankula a duniya, ciki har da yakin basasar Angola, wanda ya zama fagen yakin cacar baki, da kuma tsoma bakin Amurka a Chile, wanda ya kai ga juyin mulki a 1973.