‘Yan Najeriya na ci gaba da nuna kwazo a wasannin cin kofin duniya na matasa masu kasa da shekaru 17, wanda ake gudanarwa yanzu haka a kasar Chile, inda ‘yan wasan na Eaglet suka rugurguza masu masaukin baki da ci 5 – 1 a safiyar yau Laraba.
Kaftin Kelechi Nwakali ne ya zarga kwallo ‘daya, sai kuma Victor Osimhen da Samuel Chukwueze wadanda kowannensu suka jefa kwallaye biyu a wasan na yau.
Mai masaukin baki wato kasar Chile tayi kunnen doki da Crotia a wasan share fagen wasannin, hakan ne yasa a wasan na yau Chile tayi kokarin ganin ta samu nasarar farko a wannan gasar, amma matasan Najeriya sukace ba da su ba.
Yanzu haka dai Golden Eaglet nada maki shida kuma suna a matsayi na farko a rukuninsu, sai dai zasu kara da Croatia a karo na biyu na wasannin ranar Juma’a idan Allah ya kaimu.