Shugaban kasar Amurkan ya shaidawa tashar talabijin ta CBS News cewa, “ zan tafi ba tare da tsammanin wata ci gaba mai ma’ana ba, ba zan tafi da wani dogon buri ba.”
Trump yaki bayyana gurin ganawar da ta kasance irinta ta farko tsakanin shugabannin na kasashen duniya, sai dai ya yi alkawarin cewa, babu wani mugun abu da ganawar zata haifar. Trump da Putin sun tattaunawa a lokutan baya a gefen tarukan kasa da kasa.
Ganawar da Trump zai yi da Putin tazo ne bayan kwanaki uku da kwamitin bincike na musamman da Robert Mueller ke jagoranta ya tuhumi jami’an leken asirin kasar Rasha goma sha biyu, bisa zargin katsalandan a zaben shugaban kasar Amurka na shekara ta dubu biyu da goma sha shida da nufin taimakawa Trump ya lashe zaben.
Rasha bata da yarjejeniyar tasa keyar mai laifi da Amurka, sabili da haka ana shakkun zata mika jami’an ga Amurka domin a shari’anta su.