ABUJA, NAJERIYA - Masana dai sun ce akwai yiyuwar matakin na hukumar sadarwa ta Najeriya wato NCC ya kai ga rufe kimanin layin sadarwa sama da miliyan 11 biyo bayan karewar wa'adin ranar 28 ga Fabrairu na haɗa lambar shedar zama dan kasa wato NIN da Lambobin wayoyin tarho.
Kamfanonin sadarwar dake kasuwancinsu a Najeriya dai na bin umarnin hukumar NCC ne ganin yadda daraktan hulda da jama’a na NCC, ya sake shaidawa manema labarai cewa wa’adin hukumar ta ranar 28 ga Fabrairun shekarar 2024, ya kare, kuma ba gudu ba ja da baya kan matakin, yana mai cewa masu amfani da layukan wayar salula da su tuntubi kamfanonin sadarwar su don hade SIM cards din su da lambar NIN don sadarwa.
Tuni dai wasu ‘yan Najeriya ke ta kokawa a kan yadda matakin NCC da kamfanonin sadarwar kasar suka aiwatar ya jawo musu asara mai tarin yawa.
Wani Mazaunin jihar Osun dake yammacin Najeriya, Abdulganiyu Abdulrahman, ya ce matakin kamfanin MTN ya jawo masa asara yana mai mika bukatar a bude masa layinsa.
A cewar wani mazaunin jihar Sakkwato, Abdulrahman Salihu Abba, matakin kamfanonin sadarwar ya gurgunta masa al’amurran kasuwanci abun da aka dauki tsawon lokaci bai fuskanta ba a baya.
A wani bangare kuma, kwararre a fannin sadarwa kuma tsohon kwamishinan yada labaran jihar Adamawa, Alhaji Ahmad Sajoh ya ce kamata ya yi kamfanonin sadarwa da gwamnati su bi ‘yan Najeriya da lallami, a fahimtar da su mahimmancin hade layukan sadarwarsu da lambar NIN ba wai amfani da iko ba.
A yayin da ake cece-kuce a kan cewa akwai hukuncin kotu da ya hana hukumar NCC aiwatar da matakin rufe layukan sadarwar wadanada basu hade nasu da lambar NIN ba, masanin shari’a Barrister Mainasara Kogo ya ce, ‘yan kasa na da ‘yanci kamar yadda hukumar NCC ma na da yancin daukan mataki, yana mai cewa a yi la’akari da sashe na 14 sakin sashe na 1 na tsarin mulkin Najeriya wanda yace domin jama’a ne ake neman ‘yanci.
Idan ana iya tunawa, a ranar 16 ga watan Disambar shekarar 2020 ne gwamnatin Najeriya ta ba da umarnin a haɗa layukan sadarwa wato SIM card da lambar shedar zama dan kasa wato NIN tsarin da aka fitar da nufin magance matsalar rashin tsaro a kasar ta hanyar taimakawa hukumomi wajen zakulo ‘yan fashi da ‘yan ta’adda.
Bayanai daga shafin intanet na hukumar NCC sun yi nuni da cewa akwai layukan wayar hannu miliyan 224 da dubu 700 da ke aiki a Najeriya saidai kuma hukumar kula da rijistar shedar dan kasa ta NIMC ta ce ya zuwa yanzu ta ba da lambar NIN miliyan 104.
A saurari cikakken rahoton Halima Abdulrauf:
Your browser doesn’t support HTML5
Ba Za'a Sami Nasarar Hade Layukan Salula Da Lambar Shedar Dan Kasa Ba Idan Ana Amfani Da Karfin Iko - Masana