'Yan sandan Najeriya sun ce mutane 21 a kalla aka kashe a cikin wata kakkarfar fashewar bom da ta wakana a wata cibiyar hada-hadar kasuwanci a Abuja.
Kakakin 'yan sanda Frank Mba yace fashewar ta yau laraba a Emab Plaza ta raunata mutane 17 a kalla. Amma darektan hukumar ayyukan agajin gaggawa ta birnin tarayyar Abuja, Alhaji Abbas Garba Idris ya ce a nasu sanin mutane 52 ne suka raunata kuma su na samu kulawa a manyan asibitoci daban-daban a garin Abuja.
Babu bayani game da musababbin fashewar.
Wani shaida ya gayawa Muryar Amurka cewa wani bom din da aka dasa a cikin wata mota ne yayi bindiga. Amma wasu kuma sun ce wani mutum ne akan babur ya wurga wani bom.
Wakiliyar Muryar Amurka a Abuja Heather Murdock ta je inda bom din ya fashe, ta ce wurin ya na hargitse.