Zanga-Zangar Kin Jinin Shugaba Lukashenko Na Kara Zafi A Belarus

'Yan Sanda sun ce sun kame masu zanga-zanga sama da 400 a birnin Minsk kuma suna ci gaba da kamen ya zuwa yammaci.

Yayin da jama’a ke ci gaba da nuna kin amincewarsu da Lukashenko, wanda ya yi mulkin kasar da ke karkashin renon Rasha na tsawon shekaru 26, Rashar ta ce za ta taimaka masa ta hanyar turo dakarunta a Belarus.

Masu zanga-zangar na da’awar cewa Sviatlana Tsikhanouskaya ce ta lashe zaben na 9 ga watan Agusta. Manyan jagororin adawa da dama an kullesu ko kuma sun arce daga kasar, inda a yanzu haka Tsikhanouskaya tana Lithuania.

Lukashenko ya musanta zargin cewa an yi magudi a zaben, kana yana zargin cewa wasu manyan kasashen waje ne ke hura wutar zanga-zangar.