‘Yan sanda na tuhumar wani mutum mai shekaru 45 da haihuwa ‘dan asalin jihar New Mexico a Amurka da laifin sata, mutumin dai ya shiga wani gida da ba’a kulle ba ya kuma saci ‘dan mukullin mota, amma bai bar gidan ba inda ya tsaya gasa dankali wanda har masu gidan suka dawo.
Jaridar Sun report ce ta tabbatar da cewa jami’an ‘yan sanda sun kame wannan ‘barawo mai suna Patrick Lynn, a ranar Talatar da ta wuce.
Jami’an tsaro sun fitar da rahotan cewa matar gidan ce ta ji kara a ‘dakin girki, inda ta shiga domin ta ga me ke faruwa ta kuma tarar da shi Patrick yana goge teburin ajiye kaya, yana kuma gasa dankali. Ta tambayeshi me yake yi a gidan ta? Ya bata amsa cewa yana gasa dankali ne.
Matar ta umarce shi da ya fice mata daga gida, ya fita kofar gida inda ya fara sharar ganyen bishiya da suka zube a kasa.
Da matar taga haka sai ta yi kokarin yi masa wayo inda tace zata biyashi ladan aikin da yayi mata in har zai tsaya ya ‘karasa, tayi haka ne domin ta baiwa ‘yan sanda lokacin zuwa su same shi.
Jami’an dai sun kame Patrick a kan hanya yana tangadi wanda da alamu yana cikin maye, a cewar ‘yan sandan. Yanzu haka dai ana tuhumar sa da laifuka masu yawa wanda suka hada da shiga gidan mutane batare da izni ba da sata. Babu tabbacin ko mutumin yana da lauyan da zai kare shi a kotu ko a’a.
