NIGER, NIGERIA- Rahotanni daga yankin na Alawa na nuna cewa hatta sojojin da aka jibge a karamin sansanin sojojin na Alawa a cikin daren Laraba da ta gabata sun kwashe kayansu sun bar wurin.
Wani Mazaunin yankin da ya tsallake rijiya da baya ya kuma bukaci a sakaya sunanshi ya ce kasa da mako guda mayakan na kungiyar Boko Haram suka kona garuruwa sama da biyar a yankin na Alawa san nan suka ci gaba da binne bama bamai akan hanya.
Rahotanni dai sun nuna cewa ko baya ga kashe sojoji shida a makon da ya gabata da ranar Litinin ma wasu sojojin biyu sun mutu sannan kaftin guda na sojojin yayi mummunan rauni a sakamakon wani bom da motarsu ta taka.
Hon. Akilu Kuta shugaban karamar humumar Shiroron ya ce suna cikin tashin hankali a sakamakon yadda ayyukan mayakan kungiyar ta Boko Haram ke kara yawa a ‘yan kwanakin nan.
A zantawa da Muryar Amurka shugaban na karamar hukumar shiroro Akilu Kuta ya ce tashin sojojin daga wannan yanki ya kara jefa mutanensu cikin wannan tashin hankali.
Kawo lokacin hada wannan rahoto dai babu wani karin haske daga rundunar sojin Najeriya akan cire sansanin sojojin na Alawa domin kuwa kokarin samun hedikwatar sojojin ta Najeriya yaci tura.
Saurari cikakken rahoto daga Mustapha Nasiru Batsari:
Dandalin Mu Tattauna