Trump ya rattaba hannu kan umurninsa na shugaban kasa wanda ya ce zai hana Khamenei da Iran harkar cinikayya da duniya. Sakataren baitilmalin Amurka Steve Mnuchin ya ce wannan mataki ne da zai tsaida kaddarorin biliyoyin daloli na Iran.
Trump, ya kira wannan umurnin na shi "mai karfi kuma wanda ya dace" a matsayin martanin Amurka ga kakkabo jirgi marar matuki na Amurka da Iran ta yi a makon jiya. Amurka ta ce jirgin na tafiya ne a yankin sararin sama na kasa da kasa, daura da Hormuz, amma ita Iran ta ce jirgin ya shiga yankin sararin samanta.
Saura 'yan mintoci kawai jiragen Amurka su yi barin wuta kan Iran ranar Alhamis, sai Shugaba Trump ya yanke shawarar cewa ba zai dau irin wannan matakin sojin ba saboda harbo jirgin Amurka mara matuki da Iran ta yi, bayan da aka gaya masa cewa harin na iya sanadin mutuwar Iraniyawa kimanin 150.
Yayin da yake jawabin sanarda wannan takunkumin, Trump ya ce, "Ina ganin mun nuna matukar hakuri, amma ba lallai bane mu kara daurewa irin haka a gaba. Amma za mu gwada yanzu."
Facebook Forum