Wakilai da ‘yan wasan Najeriya, na Golden Eaglets, ‘yan kasa da shekaru 17, sun bar Najeriya, zuwa kasa Koriya, inda zasu buga wata gasar ta kasashen hudu da aka yiwa lakabi da Suwon.
Tawagar ‘yan wasan dai, da jami’an su sun bar Najeriya, batare da kaftin din kungiyar ba Kelechi Nwakali da kuma mai kula da ‘yan wasan Prince Udofia.
Saboda ofishin jakadanci kasar Koriya a Najeriya, ta maido da fasfo din mutanen biyu da bayanin cewa sun kasa karanta rubutun dake kan fasfo din, bayanin da ya baiwa hukuma kwallon kafa ta Najeriya, mamakin ganin cewa domin da fasfo din suke tafiye tafiyen.
Hukumar kwallon kafa ta Najeriya, NFF, tace zata yi iya kokarinta na ganin cewa kasar Koriya ta basu visa a yau litinin saboda su samu tashi gobe talata domin tadda sauran ‘yan kungiyar.
