An rufe jami’ar Lagos sakamakon zanga zangar lumana da daliban makarantar suka yi akan karancin ruwan fanfo, wutan lantarki da man fetur wanda sukace yana kawo cikas ga rayuwar su na dalibai.
Tun a jiya ne dai jami’an ‘yan Sanda suka ja daga a wajen harabar jami’ar, ta Lagos, domin daukar matakan ko ta kwana.
A yau ne dai daliban jami’ar suka waye gari, da samun sakonin cewa an rufe wannan jami’a, har sai abinda hali yayi, a jiya ne dai daliban jami’ar, suka fara gudanar da wata zanga zangar lumana domin nuna adawarsu dangane da rashin wuta da ruwa da kuma man fetur abinda su kace na kawo cikas ga karatun su tare da kira ga hukumomin jami’ar dasu dauki matakai na gaggawa da zai kawo karshen wannan matsala.
Har zuwa lokacin da wakilin muryar Amurka ya bara harabar makarantar akwai ‘yan Sanda a kofar makarantar da suke jiran ko ta kwana inda kuma suke bukatar daliban dasu fice daga jami’ar, a inda suma daliban suka dage cewa ba zasu fice ba, ko da yake wasu daga ciki daliban sun fara ficewa.
