Karshenta dai, David Moyes ya samu sabuwar kulob a kasar Spain, a bayan da kungiyar Manchester United ta yi waje rod da shi a watan Afrilu, ‘yan watanni kadan bayan da ya rattaba hannun kwantarakin shekaru 6 da ita.
A yanzu, kungiyar Real Sociedad mai bugawa a waswannin lig-lig na Spain da ake kira La Liga, it ace ta yi hayar Moyes, ita ma a bayan da ta kori kwach dinta Jagoba Arrasate a farkon watan nan ganin yadda kulob din ta kasa tabuka komai a bana.
David Moyes shi ne ya gaji mashahurin kwach, Alex Ferguson a Manchester United, amma zamansa a can bai yi armashi ba, inda Man U ta kasa tabuka komai a Firimiya Lig, ta kasa tabuka komai a gasar zakarun kulob na Turai, ta kasa yin komai a gasar kofin kalubalenka na Ingila.
Kafin na kuwa, Moyes ya shafe shekaru 11 yana koyar da ‘yan wasan Everton, inda aka yi ta yaba masa saboda farfado da wannan kungiya.
A yanzu, Moyes mai shekaru 51 da haihuwa zai yi kokarin sake farfado da martabarsa na kwach a La Liga ta hanyar taimakawa Sociedad cirawa sama a teburin la Liga.
A yanzu dai kungiyar it ace ta 15 teburin.
