Jose Mourinho yace Nemanja Matic ya zamo jigo, kuma kashin bayar kungiyar Chelsea, tun komawarsa kulob din a bana.
Matic, mai shekaru 26 da haihuwa, ya koma Chelsea, a karo na biyu cikin watan janairu daga kungiyar Benfica, kuma tun lokacin ya kasance yana burge abokan wasa da magoya bayan Chelsea, balle masu koyar da wasa na kulob din. A wasan da Chelsea ta doke Liverpool da ci 2-1 a ranar asabar din nan ma, Matic shi ne aka zaba gwarzon dan wasa na wannan bugawar.
Mourinho, bai yi nauyin baki ba wajen yabawa Matic dan kasar Serbia, yana mai bayyana shi da cewa, babu dan wasa kamarsa. A wannan lokacin, babu babba kamarsa, in ji Mourinho, ba wai babba a tsawo ko girman jiki ba, amma babba a filin wasa.
Haka kuma Mourinho ya yaba da irin kudurin ‘yan wasan Chelsea a bana, yayin da suke more kasancewarsu a saman teburin Firimiya Lig.
