‘Yan wasan Super Eagles na Najeriya, Ahmed Musa da Vincent Enyeama, sune kadai ‘yan Najeriya da suka samu shiga cikin jerin ‘yan wasa 25 da hukumar Kwallon Kafa ta Afrika, CAF, ta ce zata tankade su ta zabi zakaran kwallon kafa na Afirka na bana daga cikinsu.
Ahmed Musa, wanda ke buga ma kungiyar CSKA Moscow da Enyeama sun shana sosai ma Najeriya a lokacin gasar cin kofin kwallon kafar duniya da aka yi a Brazil.
A bangaren zakaran wasan kwallon kafa na bana masu bugawa cikin Afirka kuma, dan wasan Najeriya Ejike Uzoenyi na Mamelodi Sundowns ta Afirka ta Kudu kadai ne ya shiga cikin jerin ‘yan wasa 20 da aka zaba za a yi tankade cikinsu.
Sanannun ‘yan wasan Najeriya da aka yi waje rod da su daga cikin jerin zakarun wasa na Afirka a bana sun hada da Mikel Obi na kungiyar Chelsea, wanda a bana ya kasa tabuka wasan kirki ma kulob din nasa da kuma Najeriya. Idan ba a manta ba, ‘yan Najeriya da dama sun nuna fusata a lokacin da aka tsallake Mikel Obi aka zabi Yaya Toure na Cote D’Ivoire a zaman zakaran kwallon kafa na Afirka na shekarar 2013.
