A yau Talata, wani ibtila'i ya abkawa jihar Borno, inda gobara ta kone sansanin 'yan gudun hijra na Muna dake shiyar Muna na jihar dake yankin arewa maso gabashin Najeriya, wanda yayi sanadiyar mutuwar yara 2.
WASHINGTON DC - Har sa'ilin hada wannan rahoton ba'a kai ga tantance musabbabin tashin gobarar ba.
Kuma, har yanzu gwamnatin Borno ko rundunar 'yan sandan jihar basu ce uffan game da al'amarin ba.
Jihar Borno na fama da masu tada kayar bayan kungiyar Boko Haram tsawon gwamman shekaru al'amarin da yayi sanadiyar asarar dubban rayuka da raba dimbin jama'a da gidajensu.