Sauran Duniya

Turkiyya Ta Nemi a Mutunta Sakamakon Zabenta

Shugaban Turkiyya, Recep Tayyib Erdogan, ya fadi yau Litini cewa ya kamata duniya ta mutunta nasarar da jam'iyyarsu ta Adalci da ci gaba ta samu a zaben majalisar dokokin da aka gudanar, wanda ya bayyana da cewa zabin kwanciyar hankali mutanen kasar ta Turkiyya su ka yi.
WASHINGTON D.C. — 

Zaben na jiya Lahadi ya sake maida kasar ta Turkiyya kasa mai jam'iyyar siyasa guda, bayan watanni biyar kawai da jam'iyyar ta AKP ta rasa rinjayenta a majalisar dokokin kasar a karo na farko cikin sama da shekaru 10.

Jam'iyyar ta samu kashi 50% ne kawai wato kujeru 316 a Majalisar dokokin mai jimillar kujeru 550.

Babbar jam'iyyar adawa kuma CHP, ta sami dan sama da kashi kashi 25%, wanda ya tabbatar da wagegen gibin nasara ga jam'iyyar AKP fiye da yadda aka zata a baya.

Firaminista Ahmed Davutoglu ya bayyana aniyar hada kan kasa yayin da ya ke jawabi ga magoya baya a birnin Ankara da daren jiya Lahadi.

Ya kuma ce a samar da abin da ya kira sabuwar Turkiyya mai tsarin siyasar da ta dace.

Davutoglu ya sabunta kiraye-kirayen kwaskware kundin tsarin mulkin kasar, wani abu da jam'iyyar AKP ta nema don bai wa Erdogon karin ikon zartaswa.

Amma, duk kuwa da sabon rinjayenta a Majalisar dokoki, har yanzu jam'iyyar za ta kasa samun isassun kuri'u na yin gaban kai, wajen sabunta kundin tsarin mulki.