An haramtawa tsohon shugaban hukumar wasannin kasar Sifaniya shugabantar duk wani sha’anin wasanni tsawon shekaru uku a kasar.
Hukuncin da aka yanke wa Luis Rubiales na zuwa ne bayan da aka same shi da laifin sumbatar wata ‘yar wasan kasar ba tare da umarninta ba a gasar kofin mata ta duniya.
Jenni Hermoso
Tun a baya aka tilastawa Rubiales ya sauka a mukaminsa duk da yunkurin da ya yi na cijewa kan sumbatar ‘yar wasan Sifaniya Jenni Hermoso a bikin rufe gasar kofin duniya ta mata da Sifaniya ta lashe a ranar 20 ga watan Agusta a Australia.
Hukuncin na Rubiales na zuwa ne a ranar Juma’a wanda wata tawagar masu sa ido kan sha’anin wasannin a Sifaniya ta yanke.
Tun a baya hukumar kwallon kafa ta duniya FIFA ta haramta masa shiga sha’anin wasanni tsawon shekaru uku.