A safiyar yau Laraba Trump ya rubuta a shafinsa na twitter cewa: “Manyan jami’an binciken leken asiri na duka bangarorin magoya baya da masu adawa sun ji dadin bayanin da na gabatar a lokacin taron manema labarai a Helsinki. Ni da Putin mu tattauna kan abubuwa da dama masu muhimmanci a ganawar ta farko. Mun samu jituwa wanda ya dami yan bakin ciki dake son ganin mun yi fada. Manyan sakamako na nan tafe.”
Sakon da Trump ya rubuta a shafinsa na twitter ya biyo ne bayanda ya amsa cewa ya amince da matsayin da hukumomin leken asiri suka bada na cewa Rasha tayi kasalandan a zaben shugaban kasa na 2016.
Trump ya gayawa manema labarai cewa shima ya amince da cewa Rasha ta yi shisshigi a zaben shugaban kasa na 2016, amma ya kara da cewa ta yiwu akwai wasu mutanen da su ma suka taka rawa wajen yin katsalandan din.