Kamfanin Samsung ya bayyana sabuwar wayarsa ta Galaxy Note 8 a jiya Laraba, wadda ake kyautata tsammanin zata taimaka wajen gyarawa kamfanin suna bayan akasin da aka samu na wayar Galaxy Note 7 a shekarar da ta gabata.
Sabuwar wayar Galaxy Note 8 na ‘dauke da katon allo, da wani sabon alkalamin rubutu da kuma kamarar daukar hoto ta zamani.
Samsung ya fara kirkirar nau’in wayar Galaxy Note wadda ta samu karbuwa a duniya. Amma sai gashi wayar Note 7 da kamfanin ya fitar a shekarar da ta gabata ta sami matsala har ta kai ga kamfanin ya yi kiranyen wayoyin da ya sayar, a sakamakon zafi da batirin wayar ke dauka har ya kama da wuta.
Kamfanin Samsung na fatan ganin ya murmure da kuma dawo da martabar kamfanin ta hanyar fitar da wayar Galaxy Note 8, wadda itace wayar kamfanin ta farko da ta taba fitowa da irin kamarar dake jikin wayar.
Ya zuwa yanzu dai Samsung bai fitar da kudin da zai sayar da wayar ba, amma wasu kafofin yada labarai sun fitar da rahotan cewa wayar zata iya kaiwa dalar Amurka dala dubu ‘daya.
Your browser doesn’t support HTML5
Samsung Ta Kaddamar Da Galaxy Note 8 - 1'15"