WASHINGTON, D. C. - Ba a bayyana abin da yarjejeniyar ta kunsa ba yayin bikin rattaba hannun, wanda ya samu halartar jami'an diflomasiyya da kungiyoyin farar hula.
Kenya - Sudan Ta Kudu
Kungiyoyin 'yan adawar dai ba sa cikin yarjejeniyar shekara ta 2018 da ta kawo karshen yakin basasar Sudan ta Kudu da ya yi sanadin mutuwar mutum 400,000 tare da raba miliyoyi da matsuguninsu.
Ofishin harkokin wajen Kenya ya ce yarjejeniyar ta kasance wani mataki na farko a tattaunawar da ake ci gaba da yi inda bangarorin da ke gaba da juna suka yi alkawarin kawo karshen rikicin da tashin hankali.
Kenya - Sudan Ta Kudu
A farkon tattaunawar shiga tsakani da aka kaddamar mako guda da ya gabata, shugaban Sudan ta Kudu Salva Kiir ya godewa takwaransa na Kenya, William Ruto, kan karbar bakuncin tattaunawar.
An yi wa tattaunawar lakabin Tumaini, Swahili don bege, hikima, kuma tsohon kwamandan sojojin Kenya Lazarus Sumbeiywo ne ke jagorantar tattaunawar.
Kenya - Sudan Ta Kudu
A watan Disamba ne Sudan ta Kudu za ta gudanar da zabuka, amma har yanzu tana fama da tabarbarewar siyasa, a wani bangare na yarjejeniyar zaman lafiya ta shekarar 2018 da ba a kammala aiwatar da ita ba, kuma saboda ana ci gaba da rikici da tashe-tashen hankula a sassa daban-daban na kasar saboda bambancin kabilanci da siyasa.
-AP