Gobara ta barke a gidan ajiye dabbobin daji na birnin London, inda wani ma’aikaci ya sami rauni yayin da kuma wata dabba mai dogon hanci da ake kira aardvark ta mutu.
Haka kuma wasu dabbobi hudu masu kama da kurege da ake kira meerkat sun bace, kuma ake tunanin sun mutu dalilin gobarar, a cewar jami’an gidan ajiye namun dajin.
Sama da ‘yan kwana-kwana 70 da manyan motocin kashe gobara 10 ne suka kwashe kusan sa’o’i uku kafin su kashe gobarar.
Ya zuwa yanzu dai ba a san abin da ya haddasa gobarar ba.
An baiwa ma’aikatan gidan namun dajin takwas kulawar nan take, saboda sun shaki hayaki.
Shi dai gidan namun dajin na London yana dauke da dabbobi sama da 20,000, kuma yana cikin shahararren wajen shakatawar nan na Regents Park wanda ke birnin London, inda masu yawan bude ido kimanin miliyan 1.2 kan ziyarci wurin duk shekara.