An yankewa wani tsohon jami’in hukumar binciken manyan laifuka ta Amurka FBI hukuncin daurin shekaru hudu a gidan yari, da kuma, shekaru uku hukuma tana kyakkyawan sa ido kan al’amuransa, bayan da ya amsa laifinsa na cewa ya baiwa wani ‘dan jarida bayanan sirri.
Terry James Albury, mai shekaru 39, ya amsa laifinsa ne tun watan Afrilu, na cewa ya saci bayanan sirri na tsaron kasa kuma ya mika su ga wata kafar labarai ta yanar gizo da ake kira The Intercept.
Hukuncin da aka yanke masa bai kai wanda masu gabatar da ‘kara suka nema ba, suna mai jayayyar cewa Albury yaci amanar da mutane suka bashi, ta hanyar kwarmata bayanai har 70, kuma 50 daga cikinsu na sirri ne.
Lauyan dake kare Albury ya nemi alkali ya yanke masa hukuncin jeka gyara halinka, yana mai cewa abin da ya gano lokacin da yake jami’in FBI na tsawon shekaru biyar a matsayinsa na bakar fata, ya haddasa masa rikicewa kan ana nuna wariyar launin fata a yaki da ta’addanci da ake.