Shugaban Amurka Donald Trump, ya halacir bikin zagayowar ranar 11 ga satumba a Shanksville a jahar Pennyslvania kusa da inda jirgin saman kamfanin united mai lambar tafiya casa’in da uku ya fadi bayan da fasinjojin cikin jirgi suka kwace jirgin daga yan kungiyar ta’addancin al-qaeda da suka yi fashin jirgin.
A ayyanawar shugaban kasar na shekara shekara, ya ayyana 11 ga satumba a zaman ranar kishin kasa, Trump yace wannan mummunar aika aika bata dakushe kudurin kasar akan yanci ba.
Shi kuma, mataimakin shugaban kasa Mike Pence yana halartar bikin a ma’aikatar tsaron Amurka ta Pentagon ga iyalan wadanda aka kashe lokacin da jirgin saman da aka yi fashin sa ya afkawa ginin.
A can birnin New York kuma, daruruwan mutanen da suka tsira da iyalan wadanda suka mutu zasu ko kuma sun taru a inda tagwayen ginin cibiyar hada hadar kasuwancin kasa da kasa take kafin jiragen saman guda biyu da aka yi fashin, su suka afkawa ginin.