‘Yansandan ingila sunce sun tsaida wasu mutane biyar da suka tuko motarsu, suka tasarwa wata ma’aikatar sarrafa makaman nukiliya dake arewa-maso-yammacin Ingilar.
Daman PM Ingila din, David Cameron ya riga ya gargadi mutanen Biritaniya da su zauna cikin halin shiri saboda sa-ran hare-haren maida martani kan kashe madugun al-Qaida Osama Bin Laden da aka yi.
Rundunar ‘yansanda ta Cumbria tace tana tsare da wadanan mutanen biyar wadanda dukkansu matasa ne ‘yan shekaru ashirin-ashirin, kuma tuni ma aka kwashe su zuwa Manchester inda ‘yansandan yaki da ta’addanci ke ci gaba da yi musu tambayoyi.
