WASHINGTON, DC —
‘Yan sanda sun ce bus din na dauke ne da fasinjoji 44, wadanda mafi yawansu sun manyanta, a lokacin da motar ta kife a yammacin jiya Litinin a wata babbar hanya dake Taipei, babban birnin Taiwan.
Jami’a sun ce mutane 12 na karbar magani a asibiti, kuma da yawa daga cikinsu suna dauke da munanan raunuka.
Wani hoton bidiyo da motar da ke bayan bus din ta dauka, ya nuna yadda bus din ta kife ta kuma zame yayin da take kokarin shan wata kwana.
Hukumomin a Taiwan sun ce suna kokarin su gano abin da ya haddasa hadarin tare da yin dubi ko motar na dan-karan gudu ne.
Wani hadarin mota da aka yi a bara ya halaka wasu ‘yan yawon shakatarwar China su 24.
