‘Yan jam’iyar Republican suna cizon yatsa, biyo bayan gaza cimma burinsu na rage sa hannun gwamnati a tsarin inshorar kiwon lafiya, da ya bada damar ci gaba da amfani da dokar kiwon lafiya ta tsohon shugaban kasar Barack Obama da ake kira Obamacare.
Kasa samun goyon bayan kafa dokar kiwon lafiyar da ‘yan jam’iyar Republican suka yi, wani babban koma baya ne ga shugaba Donald Trump, da ya kuma karawa ‘yan jam’iyar Democrat marasa rinjaye karfin guiwa.
Shugaban 'yan Republican masu rinjaye a majalisar dattijai, Mitch McConnell, ya bayyana wannan koma baya, bayanda ‘yan jam’iyar guda biyu suka yi watsi da kudurin.
‘Yan jam’iyar Republican sun gabatar da wata shawarar soke tsarin inshora na Obamacare ba tare da maye gurbinta ba baki daya. Nan da nan sanatoci ‘yan jam’iyar Republican suka nuna rashin goyon bayan wannan shawarar, kamar yadda ‘yan jam’iyar Democrat suka yi.
Trump ya yi alkawarin jam’iyar Republican zata sami nasara a wadansu batutuwa masu muhimmanci kamar, yiwa tsarin haraji garambawul, sai dai masu kula da lamura suna cewa, zai kara zama mawuyaci kasancewa, ‘yan jam’iyar Republican sun sami rauni, yayinda tauraron shugaba Trump yake dishewa bayan koma bayan da ya samu a batun tsarin kiwon lafiyar.
Facebook Forum