Katsewar intanet a sassan duniya ta haifar da tarnaki inda aka dakatar da tashin jirage, ayyukan bankuna suka tsaya yayin da wasu aikace-aikacen asibitoci ma suka tsaya cik.
Kamfanin CrowdStrike mai tsaron yanar gizo a ranar Juma’a ya ce ba batu ne na tsaro da ya shafi kutse ba.
Kazalika matsalar ta shafa har da wasu kafafen yada labarai wadanda suka kasa watsa shirye-shiryensu.
A cewar AP, kamfanin na CrowdStrike ya ce ana kan shawo kan matsalar.
Sai dai sa’o’i bayan sanarwa da kamfanin ya fitar, an lura cewa matsalar ta kara ta’azzara.
A filayen tashin jirage a Amurka, da nahiyar turai da Asiya, rahotanni sun ce an ga dogayen layuka bayan da masu tarbar fasinjoji suka tsaya cik da ayyukansu sanadiyar wannan matsala.
A Australia, matsalar ta tilastawa kafofin yada labarai tsayar da shirye-shiryensu.
A Afirka ta Kudu, ayyukan bankuna sun tsaya sanadiyyar wannan katsewa yayin da a New Zealand hanyoyin biyan kudaden da ke amfani da kati suka samu tangarda.
Dandalin Mu Tattauna