Kurdawa ‘yan tawaye sun kashe sojojin Turkiya ashirin da shidda suka kuma raunata goma sha shidda a kusa da kan iyakar Turkiyya da Iraqi.
Hukumomin Turkiyya sunce 'yan tawaye daga kungiyar PKK sun bude wuta akan sansanonin soja a Cukurca da Yuksekova a lardin Hakkari dake kudu maso gabashin kasar.
Rahotannin sunce sojojin Turkiyya sun maida martani sannan suka tsallaka har cikin Iraqi suna farautar yan tawayen Kurdawa. Haka kuma an bada rahoton cewa Jiragen yakin Turkiyya sun kai hare haren ramuwar gaiya.
Shugaban Turkiya Abdullahi Gul ya fadawa 'yan jarida, ramuwar gaiyar wadannan hare hare ba zasu yiwa Kurdawa kyau ba. A dai yan makonin da suka shige kungiyar PKK ta Kurdawa ta zafafafa hare hare akan Turkiyya.
-
