Wani tsohon dan takarar shugaban kasa kuma dan gwagwarmaya wanda ya kasance daya daga cikin masu shirya zanga-zangar 1 ga watan Oktoban, Omoyele Sowore, ya yi karin haske a kan batun a shafinsa na X a yau Litinin, inda ya jaddada aniyar ci gaba da shirin, sannan yace za ta gudana a ko’ina a fadin Najeriya.
Ya rubuta cewar, “babu gudu babu ja da baya! #babu tsoro a Oktoba”
Zanga-zangar gama-garin za ta gudana a dandalin Eagle Square dake Abuja, a cewar Sowore.
Yayin da yake bayani game da yadda zanga-zangar zata kasance, Sowore yace za ta kasance ta lumana.
“Zanga-zangar zata gudana a ko’ina a fadin Najeriya saboda girman barna da yunwa da rashin tsaro da tsadar rayuwar da gwamnati mai ci ta haddasa ta mamaye ko’ina a fadin kasar nan. Kuma ina kara nanata cewar, zanga-zangar ta lumana ce, kamar yadda aka saba.
A jihar Legas, masu shirya zanga-zangar sun tsara fara maci daga karkashin gadar Ikeja da misalin karfe 7 da rabi na safe.
Kalaman na Sowore na zuwa ne bayan da rundunar ‘yan sandan Najeriya tace ba a sanar da ita game da kowacce irin zanga-zanga ba.
Dandalin Mu Tattauna