WASHINGTON D.C —
A yau Asabar Sakataren tsaron Amurka, Ash Carter, ya tabbatar da mutuwar sojoji tara a sansanin na Fort Hood.
A ranar Alhamis aka gano wasu gawarwaki biyar bayan da wata gingimarin motar sojojin ta kife a ambaliyar ruwa da ta mamaye sansanin.
Akalla sojoji uku ne suka tsira da rayukansu kuma suna cikin yanayi mai kyau a cewar rahotanni. Su dai dakarun suna halartar wani horo ne a sansanin a lokacin da ambaliyar ruwan ta abkawa sansasnin.
A cewar Carter, dakarun Amurka za su koyi darasi daga wannan ala’mari domin kaucewa aukuwar irin wannan hadari a nan gaba.
Yankin na Fort Hood, da ke da tafiyar kilomita 320 daga birnin Houston, ya sha fama da saukar ruwan sama kamar da bakin kwarya a ‘yan kwanakin da suka gabata.
